सुशासन र समान अवसरको वाचा गर्दै चुनावी दौडमा सशक्त उपस्थिति

महेश सिंह, लहान (सिरहा) — सिरहा जिल्ला निर्वाचन क्षेत्र नम्बर १ मा चुनावी प्रतिस्पर्धा तीव्र बन्दै जाँदा जनमत पार्टी का उम्मेदवार रामस्वरुप चौधरी ले आफ्नो अभियानलाई “न्याय र अधिकार” को एजेन्डासँग जोड्दै फरक सन्देश दिन खोजेका छन्।
परम्परागत विकासका प्रतिवद्धताभन्दा अलग शैलीमा चौधरीले कानुनी पृष्ठभूमिलाई चुनावी एजेन्डाको केन्द्रमा राखेका छन्। अधिवक्तासमेत रहेका उनले निमुखा, पीडित तथा हिंसा प्रभावित समुदायका मुद्दामा विगतदेखि गर्दै आएको पैरवीलाई राजनीतिक अभियानसँग जोड्दै “न्यायमै आधारित विकास” को अवधारणा अघि सारेका छन्।
घरदैलोका क्रममा उनी मतदातासँग केवल भौतिक पूर्वाधारको प्रतिबद्धता मात्र होइन, अधिकार सुनिश्चितताको प्रश्न उठाइरहेका छन्। विशेषगरी मधेस र मधेसी समुदायको पहिचान, प्रतिनिधित्व र राज्य संरचनामा समान पहुँचको मुद्दालाई उनले प्राथमिकता दिएका छन्।
स्थानीय विश्लेषकहरूका अनुसार सिरहा–१ मा लामो समयदेखि उठ्दै आएका पहिचान र अवसरका सवालहरू चुनावी बहसको केन्द्र बन्न थालेका छन्। यस्तो परिवेशमा कानुनी दक्षता र अधिकारमुखी एजेन्डाले चौधरीलाई फरक पहिचान दिलाएको देखिन्छ।
चौधरीले टोलभेला, सघन भेटघाट र लक्षित जनसम्पर्क कार्यक्रममार्फत युवावर्ग तथा सचेत मतदातालाई आकर्षित गर्ने रणनीति लिएका छन्। उनले सुशासन, पारदर्शिता र कानुनी राज्यको प्रत्याभूति दिलाउने वाचा गर्दै “विकासभन्दा पहिले न्याय” को सन्देश दोहोर्‍याइरहेका छन्।
चुनावी मैदानमा मुद्दाको बहस कति प्रभावकारी हुन्छ भन्ने प्रश्न बाँकी रहे पनि, सिरहा–१ मा यसपटक अधिकार र पहिचानको विमर्शले चुनावी प्रतिस्पर्धालाई नयाँ आयाम दिएको छ।