गौरको कर कार्यालय स्थानान्तरणविरुद्ध रौतहटमा बजार बन्द

गौर । गौरस्थित करदाता सेवा कार्यालयको सामानहरू गुपचुप तरिकाले ट्रकमा लोड गरेर लैजान थालेपछि स्थानीय व्यापारीहरू आन्दोलनमा उत्रिएका छन्।

चुनावको मुखमा करदाता सेवा कार्यालयमा भएको सरसमानहरू ट्रकमा लोड गरेर बाराको सिमरास्थित कर कार्यालयमा लैजान थालेपछि स्थानीय उद्योगी तथा व्यवसायीहरूले अवरोध खडा गरेर पुन: ट्रकमा लोड भएका सामान अनलोड गराएका छन्। रौतहट उद्योग वाणिज्य संघका पदाधिकारी, स्थानीय व्यापारी, राजनीति दलहरू बाटोमा बसेर अवरोध खडा गरेपछि उक्त सामानहरू पुनः अनलोड भई उक्त कार्यालयमा राखिएको छ।

व्यापारीहरू बाटोमा बसेर अवरोध सृजना गर्दा बाक्लो संख्यामा सुरक्षाकर्मीहरू उपस्थित भए पनि ट्रकमा लोड भएका सामानहरू पुनः कार्यालयमा राखिएको रौतहट उद्योग वाणिज्य संघका महासचिव सन्तोष केसरीले बताए। उनले मुलुक निर्वाचनमय बनिरहेको समयमा कार्यालयका सामानहरू लैजान खोजेपछि कार्यालय पुनः स्थापनाको माग गर्दै बाटोमा बस्नु परेको बताए।

नेपाली कांग्रेसका युवा नेता एवं मधेस प्रदेशका प्रचार विभाग प्रमुख नितेशकुमार गुप्ताले चोर शैलीमा कार्यालय सार्ने सरकारको नियतमाथि गम्भीर प्रश्न उब्जिएकाले सरकारले अविलम्ब गौरको करदाता सेवा कार्यालय पूर्ण रूपमा आफ्नै भवनबाट संचालन हुनुपर्ने आफूहरूको अडान रहेको प्रतिक्रिया दिए।

धर्ना स्थलमा पुगेका एमाले नेता एवं उम्मेदवार अजयकुमार गुप्ता, नेपाली कम्युनिष्ष्ट पार्टीका नेता रेबन्त झा र रास्वपा उम्मेदवार राजेश चौधरीले निर्वाचनको मुखमा कार्यालय उठाएर निर्वाचन भाँड्न खोजेको गम्भीर आरोप लगाएका छन्। उनीहरूले सरकारले नै निर्वाचन भाँड्ने काम गरेको बताए।

व्यापारीहरूलाई सहज एवं सर्वसुलभ ढंगबाट सेवा प्रदान गर्नुपर्नेमा यहाँ रहेको कार्यालय नै अन्यत्र लैजान लाग्दा एकदमै अशोभनीय र मधेसविरोधी कार्य भएको बताए।

यसैगरी विगतमा प्रमुख जिल्ला अधिकारीसँग भएको सहमति विपरीत गरिएको उक्त कार्यविरुद्ध रौतहट उद्योग वाणिज्य संघले उद्योग बजार पूर्ण रूपमा बन्द गराएका छन्।