रास्वपा अब राष्ट्रिय जिम्मेवारी वहन गर्ने चरणमा : रवि लामिछाने

चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले बदलिएको राजनीतिक परिस्थितिले रास्वपालाई मुलुकको सबैभन्दा प्रभावशाली राजनीतिक शक्तिका रूपमा स्थापित गरेको दाबी गर्दै देश रास्वपाको हातमा सुरक्षित रहेको बताएका छन्।

रास्वपाको प्रथम महाधिवेशन उद्घाटन समारोहलाई सम्बोधन गर्दै लामिछानेले जनताले दिएको विश्वासलाई जिम्मेवारीका रूपमा लिएको उल्लेख गरे। उनले राजनीतिक शक्ति हासिल गर्नु दम्भ, प्रतिशोध वा अहंकार प्रदर्शन गर्ने अवसर नभई नागरिकप्रतिको दायित्व वहन गर्ने अवसर भएको बताए।

‘देश रास्वपाको हातमा छ, देश सुरक्षित छ,’ उनले भने, ‘बदलिएको परिस्थितिले हामीलाई सबैभन्दा शक्तिशाली पार्टी बनाएको छ। तर शक्तिशाली हुनु भनेको दम्भ र प्रतिशोधको लाइसेन्स होइन।’

लामिछानेले रास्वपा लोकतन्त्र, संविधान, मानवअधिकार र नागरिक स्वतन्त्रताप्रति प्रतिबद्ध रहेको स्पष्ट पार्दै लोकतान्त्रिक मूल्य र मान्यताको संरक्षणमा पार्टी दृढ रहने बताए।

‘लोकतन्त्रका स्थायी मान्यता, संविधान, मानवअधिकारलगायतका उपलब्धिको हामी जगेर्ना गर्नेछौँ,’ उनले भने, ‘हामी जिम्मेवारीका साथ उभिएका छौँ, त्यसैले अन्य राजनीतिक दलहरू निर्धक्क रहन सक्छन्।’

कांग्रेस र एमालेलाई आन्तरिक समस्या समाधान गर्न आग्रह

सम्बोधनका क्रममा लामिछानेले नेपाली कांग्रेस र नेकपा (एमाले) जस्ता प्रमुख राजनीतिक दलहरूलाई आफ्ना आन्तरिक समस्या समाधान गर्न पनि आग्रह गरे। उनले ठूला राजनीतिक दलभित्र देखिएका विवाद र असहजताले अन्ततः राष्ट्रिय राजनीतिलाई नै प्रभावित गर्न सक्ने चेतावनी दिए।

‘सबै दल ठीक हुनुपर्छ। दुई ठूला दल नेपाली कांग्रेस र नेकपा एमालेभित्र केही अप्ठेरा देखिएका छन्,’ उनले भने, ‘त्यो अप्ठेरो केवल ती दलको मात्रै विषय होइन। यदि ती समस्या समाधान भएनन् भने त्यसको असर देशले पनि भोग्नुपर्ने हुन सक्छ।’

उनले राजनीतिक प्रतिस्पर्धा भए पनि लोकतान्त्रिक प्रणालीलाई बलियो बनाउन सबै दल सुदृढ, जिम्मेवार र व्यवस्थित हुनुपर्ने धारणा राखे।

‘मेरो शुभकामना छ, आफ्नो दलभित्रका अप्ठेरा मिलाउनुहोस्। हाम्रो मात्रै होइन, सबै दलका समस्या समाधान भए देश सही दिशामा अघि बढ्न सक्छ,’ उनले भने।

रास्वपा जिम्मेवारीको नयाँ चरणमा

लामिछानेले रास्वपा अब केवल वैकल्पिक राजनीतिक शक्तिका रूपमा सीमित नरही राष्ट्रिय जिम्मेवारी वहन गर्ने चरणमा प्रवेश गरेको बताए। जनताले देखाएको विश्वासलाई परिणाममा रूपान्तरण गर्नु पार्टीको मुख्य दायित्व रहेको उनको भनाइ थियो।

चितवनमा जारी रास्वपाको प्रथम महाधिवेशनमा विभिन्न राजनीतिक दलका शीर्ष नेताहरूले शुभकामना मन्तव्य दिएका छन्। महाधिवेशनबाट पार्टीको नयाँ नेतृत्व, संगठनात्मक संरचना तथा आगामी राजनीतिक कार्यदिशासम्बन्धी महत्वपूर्ण निर्णय हुने अपेक्षा गरिएको छ।