निमुखा र हिंसा प्रभावित समुदायको पक्षमा उभिँदै चौधरीको सक्रियता

महेश सिंह लहान सिरहा — सिरहा जिल्ला निर्वाचन क्षेत्र नम्बर १ मा जनमत पार्टी का उम्मेदवार रामस्वरुप चौधरी सशक्त र प्रभावशाली उम्मेदवारका रूपमा उभिएका छन्। कानुन व्यवसायी अधिवक्तासमेत रहेका चौधरी यतिबेला निरन्तर घरदैलो कार्यक्रममा व्यस्त छन्।
स्थानीय स्तरमा निमुखा, पीडित तथा हिंसा प्रभावित समुदायका मुद्दामा कानुनी सेवा र पैरवी गर्दै आएका चौधरीले आफूलाई न्यायको पक्षमा दृढतापूर्वक उभ्याउँदै आएको बताउने गरेका छन्। घरदैलोका क्रममा मतदातासँग प्रत्यक्ष संवाद गर्दै उनले मधेस र मधेसी समुदायका अधिकार, पहिचान र समान अवसरको सवाललाई प्राथमिकतामा राख्ने प्रतिबद्धता व्यक्त गरेका छन्।
मतदाताहरूले मधेसकेन्द्रित एजेन्डा स्पष्ट रूपमा उठाउने दलका रूपमा जनमत पार्टीप्रति विश्वास व्यक्त गर्दै आएका छन्। स्थानीयवासीहरूका अनुसार विगतदेखि उठ्दै आएका पहिचान, प्रतिनिधित्व र विकासका मुद्दालाई संस्थागत ढंगले अगाडि बढाउन चौधरी सक्षम उम्मेदवार हुन सक्ने विश्वास व्यक्त गरिएको छ।
चौधरीले निर्वाचन अभियानलाई अझ प्रभावकारी बनाउन टोलभेला, भेटघाट तथा जनसम्पर्क कार्यक्रमलाई तीव्रता दिएका छन्। उनले न्याय, सुशासन र समान अवसर सुनिश्चित गर्न आफू प्रतिबद्ध रहेको जनाउँदै सिरहा–१ को समग्र विकासलाई प्राथमिकतामा राख्ने बताएका छन्।