सप्तरी–४ मा रामाकान्त चौधरीको सशक्त उपस्थिति, घरदैलो अभियान तीव्र

महेश सिंह, लहान — आगामी फागुन २१ गते हुने प्रतिनिधि सभा निर्वाचनलाई लक्षित गर्दै सप्तरी जिल्ला निर्वाचन क्षेत्र नम्बर ४ मा चुनावी सरगर्मी तीव्र बनेको छ। यसै सन्दर्भमा नागरिक उन्मुक्ति पार्टी नेपाल ले रामाकान्त चौधरीलाई उम्मेदवारका रूपमा अघि सारेको छ।
उम्मेदवार रामाकान्त चौधरी यतिबेला क्षेत्रका विभिन्न बस्तीमा निरन्तर घरदैलो तथा भेटघाट कार्यक्रममा व्यस्त देखिएका छन्। मतदातासँग प्रत्यक्ष संवाद गर्दै उनले आफ्नो राजनीतिक यात्रालाई संघर्ष र पीडाबाट उदाएको अभियानका रूपमा व्याख्या गरेका छन्। “हाम्रो पार्टी पीडाबाट, जेल जीवनको अनुभवबाट जन्मिएको हो, त्यसैले अन्यायविरुद्ध बोल्ने साहस राख्छ,” उनले पत्रकारहरूसँग भने।
चौधरीले आफू लामो समयदेखि सामाजिक सेवामा सक्रिय रहेको उल्लेख गर्दै शिक्षा, स्वास्थ्य, रोजगारी र पूर्वाधार विकासलाई प्राथमिकतामा राख्ने प्रतिबद्धता जनाएका छन्। विशेषगरी किसान, श्रमिक र विपन्न समुदायका मुद्दालाई संसद्मा सशक्त रूपमा उठाउने उनको भनाइ छ।
स्थानीय स्तरमा इमानदार र स्पष्ट वक्ताका रूपमा परिचित चौधरीले राजनीतिक पारदर्शिता, सुशासन र अधिकार सुनिश्चितताको एजेन्डा अघि सारेका छन्। उनका समर्थकहरूका अनुसार विगतदेखि सामाजिक क्षेत्रमा सक्रिय भूमिका निर्वाह गरेका कारण चौधरी जनतामाझ विश्वासिलो विकल्पका रूपमा स्थापित हुन थालेका छन्।
सप्तरी–४ मा यसपटक मुख्य प्रतिस्पर्धा कडा देखिए पनि नागरिक उन्मुक्ति पार्टीले आफ्नो एजेन्डा र उम्मेदवारको छविलाई केन्द्रमा राख्दै चुनावी अभियानलाई तीव्रता दिएको छ। चौधरीले “जनताको विश्वास नै मेरो शक्ति हो” भन्दै मतदातासँग समर्थनको अपिल गरिरहेका छन्।