नुहाउने क्रममा डुबेका तीन बालबालिकालाई बचाउन सकिएन

सिरहा। सिरहाको गोलबजार नगरपालिका-७, चोहर्वास्थित पुरानो पशु हाटबजार परिसरमा जमेको पानीको खाल्डोमा डुबेर एकै परिवारका तीन बालबालिकाको ज्यान गएको छ।

प्रहरीका अनुसार मृत्यु हुनेमा अवास शेखका १२ वर्षीया छोरी सबनम खातुन, १० वर्षीया छोरी रुबिना खातुन र ७ वर्षीय छोरा साइफुल शेख रहेका छन्। रौतहटको जिगरवा स्थायी घर भएका अवास शेख विगत करिब ३० वर्षदेखि गोलबजार नगरपालिका-७ मा परिवारसहित बस्दै आएका थिए। उनी त्यहाँ भाडाको घरमा बसेर कवाडी संकलनको काम गरी जीविकोपार्जन गर्दै आएका थिए।

प्रहरीका अनुसार आइतबार दिउँसो करिब ३ः३० बजे घरबाट खेल्न निस्किएका उनका पाँच सन्तानमध्ये तीन जना पशु हाटबजार परिसरमा रहेको खाल्डोमा पुगेका थिए। गाई, गोरु, भैँसी लगायतका पशुहरूलाई पानी खुवाउने उद्देश्यले बनाइएको उक्त खाल्डोमा जमेको पानीमा नुहाउने क्रममा उनीहरू डुबेको प्रारम्भिक अनुसन्धानबाट खुलेको छ।

घटना लगतै स्थानीय बासिन्दा र सुरक्षाकर्मीको सक्रियतामा तीनै जनाको उद्धार गरी उपचारका लागि तत्काल अस्पताल लगिएको थियो। तर, अस्पताल पुर्‍याउनासाथ चिकित्सकले उनीहरूलाई मृत घोषणा गरेका थिए। हृदयविदारक यस घटनाबारे प्रहरीले थप अनुसन्धान गरिरहेको जनाएको छ।