सिरहा–१ मा विचारधारात्मक एजेन्डासहित नेपालका लागि नेपाली पार्टी सक्रिय

महेश सिंह, लहान सिरहा – सिरहा निर्वाचन क्षेत्र नम्बर–१ मा चुनावी माहोल दिनप्रतिदिन तातिँदै जाँदा नेपालका लागि नेपाली पार्टी का उम्मेदवार राम कुमार साह ‘सनातनी’ ले आफ्नो अभियानलाई फरक रणनीतिका साथ अघि बढाएका छन्। परम्परागत नाराभन्दा फरक शैलीमा उनी मतदातासँग प्रत्यक्ष बहस र संवादमा केन्द्रित देखिएका छन्।

घरदैलो कार्यक्रमका क्रममा साहले मतदातासँग केवल मत माग्ने मात्र होइन, निर्वाचन संस्कारबारे छलफलसमेत गरिरहेका छन्। उनले रक्सी र पैसाको प्रभावमा मतदान गर्ने प्रवृत्तिले लोकतन्त्र कमजोर हुने बताउँदै “मत भनेको भविष्यको जिम्मेवारी हो” भन्ने सन्देश दिइरहेका छन्। स्थानीय युवासँगको अन्तरक्रियामा उनले स्वच्छ निर्वाचनका लागि नागरिक सचेतना अपरिहार्य रहेको धारणा राखे।

साहको अभियान धार्मिक नारामै सीमित नभई सांस्कृतिक पहिचान र राष्ट्रिय स्वाभिमानको मुद्दामा केन्द्रित देखिएको छ। सिरहाको सितापुर क्षेत्रका विभिन्न टोलबस्तीमा पुग्दै उनले हिन्दू धर्म, परम्परा र स्थानीय संस्कृतिको संरक्षणलाई राजनीतिक एजेन्डासँग जोड्ने प्रयास गरेका छन्। “धर्म र संस्कृति हाम्रो पहिचान हो, त्यसको संरक्षण राज्यको दायित्व हुनुपर्छ,” उनले बताए।
उनले वर्तमान राजनीतिक संरचनाले राष्ट्रिय आत्मनिर्भरता बलियो बनाउन नसकेको आरोप लगाउँदै वैकल्पिक शक्ति आवश्यक रहेको तर्कसमेत अघि सारेका छन्। विशेषगरी युवा मतदातालाई लक्षित गर्दै उनले विदेश पलायन रोक्ने, स्वरोजगारका अवसर सिर्जना गर्ने र स्थानीय उत्पादनलाई प्रवर्द्धन गर्ने प्रतिबद्धता जनाएका छन्।
‘शंख’ चिन्हमार्फत वैकल्पिक सन्देश
आफ्नो चुनाव चिह्न ‘शंख’ रहेको जानकारी गराउँदै साहले यसलाई धार्मिक प्रतीक मात्र नभई “जागरण र परिवर्तनको संकेत” का रूपमा व्याख्या गरेका छन्। उनका समर्थकहरू गाउँ–गाउँमा शंख चिन्ह अंकित पर्चा तथा प्रचार सामग्री वितरणमा सक्रिय देखिन्छन्।
बहुदलीय प्रतिस्पर्धाबीच अलग पहिचानको प्रयास
सिरहा–१ मा विभिन्न राजनीतिक दल र स्वतन्त्र उम्मेदवारहरू चुनावी मैदानमा उत्रिएका छन्। यस्तो अवस्थामा साहले आफ्नो अभियानलाई विचारधारात्मक बहस, स्वच्छ निर्वाचन र सांस्कृतिक राष्ट्रवादको मुद्दामा केन्द्रित गर्दै अलग पहिचान बनाउने प्रयास गरिरहेका छन्।
निर्वाचन मिति नजिकिँदै जाँदा मतदाताले विकास, विचारधारा वा वैकल्पिक शक्ति—कुन पक्षलाई प्राथमिकता दिन्छन् भन्ने प्रश्न अहिले सिरहा–१ को मुख्य राजनीतिक चासो बनेको छ।